【日本、東京、草津溫泉】2016 7日6夜聖誕卡通親子遊～「Day4 2之2：日本平價門票店-「大黑屋」、玩盡Sanrio Puroland+多摩市100yen店+遇上地震經歷」

Sanrio Puroland顧名思義，就係包含哂Sanrio所出的所有卡通人物，除了主力的Hello Kitty同My Melody之外，仲有Ahiru No Pekkle、Little Twin Stars、Kero Kero Keroppi、Pochacco、Monkichi、Dear Daniel、Kuromi、蛋黃哥等等，唔知你又認得到佢地幾多個家族成員呢？

P.s：因為Sanrio以Hello Kitty為主力，所以好多人都誤叫呢度係Hello Kitty Land)

Sanrio Puroland位於日本多摩市，我地今次去就係為左見Ahiru No Pekkle，老婆最愛的一款卡通公仔，完成佢一個心願，但因為我的失誤，搞到第一次去Sanrio Puroland就錯過左同Ahiru No Pekkle見面的機會，好彩我地行程時間充裕，非常鬆動，可以安排到另一天再入去Sanrio Puroland。瞳瞳爸爸行程都有失誤架，今次就把兩天經歷二合為一，總結旅程心得，希望大家玩得開心！順利！

Ahiru No Pekkle

門票

在日本，真係唔駛為門票而煩惱，若果你在大城市入面玩，總有一間「大黑屋」在附近。(網頁：http://shop.e-daikoku.com/info/)

「大黑屋」係一間專賣各式各樣的景點門票、優惠劵、現金劵的店舖，以我地今次去Sanrio Puroland為例，在樂園門口要正價要3800 yen (當日是假日的價錢)，但大黑屋只係要2500 yen！無錯！係2500 yen，足足平左1300 yen！如果好似瞳瞳一家咁計，淨係我地兩公婆已經足足慳左2600 yen，勁開心！

當然啦！前題要知道自己附近有無「大黑屋」分店先，比個貼士大家，大多數「大黑屋」分店都係貼住車站咁開架！

如何預知卡通人物出現？

Sanrio家族實在有太多卡通人物啦，一日都出唔哂，所以不同日子都會有不同卡通人物出現，並會現身係樂園不同角落同大家影相，原來樂園每日都會預告翌日會出現的卡通人物，至於時間同影相位置，就會開門前20-30分鐘在網頁透露，所以一定要密切留意佢地個網頁呀！大家再根據自己鍾意的公仔，揀日子進場，再留意出現時間同位置就可以了！

Step by step教學：先上Sanrio Puroland官方網站，仲要係日文版先睇到架～　https://www.puroland.jp/campaign/

準備好，我地出發啦！

我地離開藤子·F·不二雄博物館(多啦A夢)後由登戶駅上車，繼續搭小田急線的唐木田方向列車，到達多摩中心駅。車駅的月台、大堂都已經有濃濃的Sanrio「味道」，不妨在每個角落搵你鍾意的卡通人物合照。

充滿Sanrio「味道」的多摩中心駅。

之後跟住Sanrio Puroland的方向指示牌行，中途會經過一個露天廣場，兩旁都係商店、食肆咁，入場前各位可以係呢度醫肚先。我地就揀左一間叫「坂內」的拉麵店，好多人食，要排隊。在日本食拉麵，一定要叫玉子(雞蛋)，半熟流心就最正，餃子亦好好味，不容錯過。

很好吃的拉麵啊

食飽飽，準備行去Sanrio Puroland正門，沿路已經有好多指示牌同卡通人物，唔會行錯路，我地先係大門口影張大合照，之後拎入場劵準備入場！

獨有的方向指示板，唔會迷路

沿途有不同的卡通公仔合照

我地到門口啦！

準備入場

呢度的工作人員打扮都好特別啊！

Sanrio Puroland係一個室內的樂園，冷、熱、曬、雨、雪都唔會受到影響，樂園有餐廳、商店及洗手間，可以話係不假外求。Sanrio Puroland有四層，我地大門一入去就已經3/F，基本上各款卡通公仔都會有自己的區域，拎張地圖慢慢行。上上落落樂園主要靠扶手電梯連接，再輔以樓梯，至於升降機就得一架，瞳瞳爸爸覺得如果推BB車的家長，可能會感到不便，要常常開車、收車～室內地方雖然唔大，不過要搵啱地方都有點難度，所以一旦唔識路，可以即刻搵附近職員協助，呢度的職員好多，所以好容易搵到幫手。我地開始精要咁介紹下面的項目，而且我地有任務在身，就係幫老婆在樂園入面，搵出佢最鍾意的Ahiru No Pekkle～

有時候唔知道位置，我都會搵工作人員幫手，佢地好nice架～

Sanrio Puroland Show

最底層係做表演，場次都幾密架，大約1小時就有一場，而觀眾們都好有默契，席地而坐，咁就唔會影響到後排睇既人啦！因為係室內的關係，所以全個場景都可以利用燈光做效果，好靚，有不同的卡通人物登場，演員的衫勁靚。表演係用日語演出，不過在歌聲、舞蹈、故事同觀眾氣氛帶動下，你都會睇得好投入！

表演節目演出時間：http://cn.puroland.jp/liveshow/

勁靚的燈光效果～

Sanrio Puroland的機動遊戲

Sanrio Puroland的機動遊戲唔多，主要有兩個：一個叫「三麗鷗明星家族飄飄船」及「Mymeroaddrive」。兩個都要花好長時間排隊，接近1小時，但玩的過程只有大約5分鐘。


「三麗鷗明星家族飄飄船」

小船會圍住個樂園繞場一圈，沿途見到好多Sanrio 的卡通人物，來個「大哂冷」。佢個位置係2/F，但排隊人龍往往上返去3/F正門咁滯，要好有耐性排隊等候，我地平均都排45分鐘或以上。因為一陣見到好多Sanrio 的卡通人物，大家的相機要準備定啊！中途會有上斜同落斜位，但放心，一D都唔恐佈。船上你可以望返落去成個Puroland場地，如果碰上做表演，仲靚仲好睇。

呢個就係排孩的入口，見到佢就表示差唔多到你上船啦～

打pat pat呢個好搞笑

好開心見到Ahiru No Pekkle

我地咁啱遇上表演呀～

官方照

「Mymeroaddrive」

位於Melody世界，是小火車，同樣要花好長時間排隊，但玩的過程亦只係5分鐘左右。話明係Melody，就成個主題都係圍繞住可愛的Melody，入面好似睇故事咁，由Melody出世到成長既故事，Melody fans絕對不容錯過！

就快到我地上車啦～

初生Melody

夢想成真：與Ahiru No Pekkle見面

每場同卡通人物合照時間有30分鐘。

我地就跟返樂園所示既時間同地點搵Ahiru No Pekkle，為了不容有失，Ahiru No Pekkle影相會1330開始，但我地1300已經開始排啦，不敢怠慢！咁早排，當然未有Ahiru No Pekkle啦，我地熱下身先，同另外兩個卡通人物影相(抱歉，真不知道他們的名字)。

人龍一路排、一路排，佢係唔會「截龍」：即係話，你有機會排緊隊的時候，未輪到你就已經換左其他卡通人物啦！所以時間上要計得好準！我唔理啦，瞳瞳爸爸決定1320再由隊尾開始排，果時見到好多Ahiru No Pekkle的Fans都開始移動去排隊啦！Fans們身上的Ahiru No Pekkle精品都好多好靚，排隊果陣不妨欣賞下。好彩，臨到我地仲有十個人左右既時候，卡通人物換班啦！

完全係驚喜！原來今場係Ahiru No Pekkle同Pochacco兩個卡通人物同場，瞳瞳媽媽終於一嘗所願同Ahiru No Pekkle合照啦！我地又影單人照、又影合照，幸好有工作人員幫忙，我們也沒有冷落Pochacco，Pochacco仲提醒Ahiru No Pekkle：「瞳瞳頭飾係你嚟架！」

影完之後，我地仲未肯離去，到差唔多1400，另一個卡通人物接手，Ahiru No Pekkle同Pochacco好有風度扶「佢」上台之後，佢地就離開了～瞳瞳媽媽就大滿足！

其實呢兩隻公仔都好得意呀！

日本Ahiru No Pekkle既fans精品

就快到我地啦，呢張算係瞳瞳媽媽同Ahiru No Pekkle的合照。

瞳瞳執到雞～哈～

Ahiru No Pekkle：BYE BYE啦

跳彈床

其實在拍照區旁邊，可以通往一個彈床區，有3至4個彈床設施，比較適合年齡較細的小朋友，佢地都玩得好開心。

 Little Twin Stars小屋

蛋黃哥之旅

除非你好鍾意「蛋黃哥」，否則唔建議入，排隊花了1小時，原來入到去只係場景比大家影相，同埋2-3部電子遊戲機玩，如果排咁耐的話，寧願玩之前介紹的「三麗鷗明星家族飄飄船」或者「Mymeroaddrive」。

尋找角落裡的Ahiru No Pekkle  &  精品店

瞳瞳媽媽努力搵佢的最愛Ahiru No Pekkle ，只要細心地搵，都可以搵到你地心愛的卡通人物架！精品店編佈各層，如果你鍾意Hello Kitty、My Melody等等卡通公仔，可以直接去佢地個專區去搵，每一間精品店賣的精品都有少少唔同架，要搵心頭好真係要行勻哂。

Sanrio Puroland可以放一日去玩，如果只係對某卡通公仔有興趣，其實半日都足夠，只係排隊會比較耐，所以瞳瞳爸爸對出日本排隊不抱怨、不焦急、勁有耐性的生活態度覺得非常佩服。樂園入面有餐廳，但我地時間所限，就沒有拜訪去了，但知道價格就比外面的店舖高，這個要留意一下。其實整體上都非常有趣，小朋友見到卡通人物會好開心，最重要係室內樂園，唔會受到天氣好壞所影響，好啱大家一家大細過嚟玩！

加遊：多摩市

我地去完Sanrio Puroland已經天黑(而且冬天比較日光時間較短)，其實離開樂園行去車站途中，有間100 yen店，佔地真係好大，我地行左好耐，買左成萬yen咁制，痴哂線。

之後我地行去「多摩センター」(Cocolia Tama-center)，一幢多層大廈式的購物中心，入面有百貨公司同食肆，我地就上左去6/F食「牛太」，打邊爐放題任飲任食，就好似香港「mou mou club」之類，佢丸類唔多，但肉類夠新鮮，真係好好味！總算我地呢個冬天行程入面食過一次日本打邊爐～

好大的100 yen店

晚上沿住好靚的燈飾佈置，食飽飽散步行返去車駅，我地就同瞳瞳經歷咗地震：我地一家準備返新宿，就係「多摩中心駅」月台等車果陣，月台上的鐘、廣告牌，不斷有聲音發出同搖擺，就好似有火車埋站，但就見唔到有車咁。看見其他日本人若無其事繼續等車，一來可能經常發生，二來震盪無乜料到。於是我又問下香港朋友仔，原來真係有地震！總算為行程又添上一個回憶。

有用資料: 

1. 大黑屋（一間專賣各式各樣的景點門票、優惠劵、現金劵的店舖）

網頁：http://www.e-daikoku.com/br12/index_zh.html

2. Sanrio Puroland

電話：+81 42-339-1111(只限日語)

地址：206-8588 Tama-shi Sanrio Puroland (「多摩中心站」旁)

網頁：https://www.puroland.jp

交通方法：可以乘坐京王線,小田急線和多摩都市單軌線至[京王多摩中心]站下車,徒步5分鐘即到。

開放時間：10:00-1700/1800 (不定期休息，必定要留意網頁)

3. Cocolia Tama Center (多摩市的大型購物中心及食肆)

網頁：http://www.cocolia-tamacenter.com/

延伸閱讀：

2016聖誕節 東京+草津溫泉 七日六夜卡通親子遊 (準備篇)

http://tungbama.blogspot.hk/2017/01/2016.html

2016東京+草津溫泉7日6夜聖誕卡通親子遊～「Day1 5之1：將更好的帶上雲霄：香港航空」

http://tungbama.blogspot.hk/2017/02/2016.html

2016東京+草津溫泉7日6夜聖誕卡通親子遊～「Day1 5之2：成田機場買「JR東京廣域周遊券」及乘坐成田N'EX到新宿」

http://tungbama.blogspot.hk/2017/02/201676day1-52jrnex.html

2016東京+草津溫泉7日6夜聖誕卡通親子遊～「Day1 5之3：新宿站6分鐘、交通便利、早餐非常豐富：新宿燦路都廣場大飯店」

http://tungbama.blogspot.hk/2017/02/201676day1-536.html

2016東京+草津溫泉7日6夜聖誕卡通親子遊～「Day1 5之4：新宿站先取未來兩天車票＞無添くら寿司@池袋＞歷史悠久的「上野動物園」」

http://tungbama.blogspot.hk/2017/02/201676day1-54.html

2016東京+草津溫泉7日6夜聖誕卡通親子遊～「Day1 5之5：暖暖聖誕牛角燒肉放題＞期間限定的溫馨浪漫燈飾＞日本剪髮初體驗」

http://tungbama.blogspot.hk/2017/02/201676day1-55.html

2016東京+草津溫泉7日6夜聖誕卡通親子遊～「Day2 3之1：出發去全日本排行第一溫泉～必食好味的火車弁當＞新宿到草津溫泉交通攻略」

http://tungbama.blogspot.hk/2017/03/201676day2-31.html

2016東京+草津溫泉7日6夜聖誕卡通親子遊～「Day2 3之2：全日本第一溫泉：「草津溫泉」+溫泉旅館 大阪屋（一泊兩食）」

http://tungbama.blogspot.hk/2017/03/201676day2-32.html

2016東京+草津溫泉7日6夜聖誕卡通親子遊～「Day2 3之3：吾妻燒肉＞草津溫泉傳統文化體驗：揉湯＞漫步草津溫泉街、光泉寺、美食」

http://tungbama.blogspot.hk/2017/03/201676day2-33.html

2016東京+草津溫泉7日6夜聖誕卡通親子遊～「Day3 2之1 溫泉旅館＞JR巴士到長野原草津口駅＞高崎駅＞輕井澤王子OUTLET」

http://tungbama.blogspot.hk/2017/03/201676day3-21-jroutlet.html

2016東京+草津溫泉7日6夜聖誕卡通親子遊～「Day3 2之2 輕井澤駅巧遇火車迷慕名弁當＞新宿晚餐：日本麥當勞＞宵夜：日本特色～屋台拉麵」

http://tungbama.blogspot.hk/2017/03/201676day3-22.html

2016東京+草津溫泉7日6夜聖誕卡通親子遊～「Day4 2之1：人人期望可達到～藤子·F·不二雄博物館(多啦A夢全面睇)」

http://tungbama.blogspot.hk/2017/03/201676day4-21fa.html

2016東京+草津溫泉7日6夜聖誕卡通親子遊～「Day4 2之2：日本平價門票專賣店-「大黑屋」介紹、為Ahiru No Pekkle而來，玩盡Sanrio Puroland+多摩市100yen店超好買+遇上地震經歷」

http://tungbama.blogspot.hk/2017/04/201676day4-22ahiru-no-pekklesanrio.html

2016東京+草津溫泉7日6夜聖誕卡通親子遊～「Day5：東京迪士尼樂園」

http://tungbama.blogspot.hk/2017/04/201676day5-21.html

2016東京+草津溫泉7日6夜聖誕卡通親子遊～「Day6：新宿站周邊散策-Yodobashi、和幸豬扒、博多天神拉麵、磯丸水產」

http://tungbama.blogspot.hk/2017/05/201676day6-yodobashi.html

2016東京+草津溫泉7日6夜聖誕卡通親子遊～「Day7：利木津巴士到東京成田機場」

http://tungbama.blogspot.hk/2017/05/201676day7.html