【香港本地親子遊】【西貢清水灣】瞳祈帶你進入神秘的「清水灣鄉村俱樂部」

瞳祈爸爸一直都有個心願，希望可以行遍香港境內大大小小所有地方，打開地圖一睇，又唔係咁多地方可以「話去就去」，例如私人地方、禁區、限制區域等等。

今次真係好好彩，瞳祈一家只係一個普通家庭，但有幸可以進入清水灣鄉村俱樂部，原來每年有一日係「全民運動日」，而清水灣鄉村俱樂部為咗嚮應呢個活動，特別開放一天給公眾申請享用入面的運動設施！

嘩嘩嘩！瞳祈爸爸網上搜尋過，佢呢度一個好基本會籍都要至少港幣四百幾萬！係四百幾萬啊～而且唔係你俾四百幾萬申請就有，仲要排隊呢！

所以今次機會係好難得，可以窺探呢個比較少人知道的地方。

前往方法有幾種，當然係要預先申請咗啦！佢有穿梭巴士來往將軍澳區的港鐵站，而我地就自駕入去，由馬鞍山出發，經西沙公路、西貢公路、清水灣道、大坳門路一直去，好舒服，我地仲專登放下車窗吹風，就好似置身於外國旅行一樣。

過咗清水灣，就快要到達之前，我地已經可以見到遠遠山頭有個高爾夫球場咁嘅地方，果度就係我地今日的目的地：清水灣鄉村俱樂部！

下面近海的小木屋漁村為「布袋澳村」

到達清水灣鄉村俱樂部的大閘啦！平時係私人地方，嚴禁進入，今次我地終於可以揸車堂堂正正咁入去啦！真係難掩興奮！

不得不提，大閘右手邊有個綠色路牌，就係通往佛堂門天后古廟（大廟），之前我地有介紹過：http://tungbama.blogspot.com/2016/04/20160426.html，亦都係我地平常人可以「到達」的極限。

事前因為有預約，門口的保安人員好快手給我們一個「訪客泊車證」，就放係車頭當眼處啦！

背面有一張簡單地圖，方便駕駛者。

門口處就有個小小招牌～

終於可以係入面揸車啦！

其實入面分為三部份：會所（你當係市中心，主要餐飲設施係哂度）、高爾夫球會同遊艇會。

一入去會所，職員們好熱情招呼我地、幫我地登記，今日係「全民運動日」，所以有紀念品送俾我地，我地當然拍照留念一下啦！

今次我地book咗去泳池游水，職員就派發手帶比我地，之後仲親身帶路去到更衣室，簡單介紹了場地設施同位置，仲分配埋locker添，非常細心～

由更衣室外面走廊望出去，會見到網球場同一部份的高爾夫球場，對岸的島嶼就係東龍島啦！

打開紀念品睇下：本身有個布袋啦、仲有簡介宣傳單張、一支水同一頂帽。

（因為不可拍照啊）更衣室入面好寬敞、舒服同乾淨，而且連沐浴用品都有提供，風筒、毛巾、鬚刨等等都一應俱全（因為不可拍照啊）

換好衣服，準備去泳池啦！

個泳池好大呀～對住大海，而且又無強烈的氯氣味道，人唔多，我地玩得好開心！

泳池係山崖上，陣陣山風吹上來，好舒服！對岸就係東龍島！

旁邊有沙灘椅、太陽傘可以曬日光浴

游水都玩了差不多兩小時。之後換好衫，再原沿路返去會所，中間經過一個兒童遊樂場，可以比兩個小朋友放電，簡簡單單幾開心！

瞳瞳姐姐就最鐘意呢個掘沙機

玩了一陣，原本打算係餐廳食下野，試下呢度的食物，不過時間太晚，最後都係決定係外面找找吃的，不過難得入到嚟，又有車，咁一定要去埋高爾夫球會同遊艇會呢兩個地方。

我地沿住路牌，先落去遊艇會睇睇

遊艇會所在位於一個叫砧板灣的地方，不過自從鄉村俱樂部進駐為遊艇興建了海堤，所以而家風平浪靜，山邊只餘幾個已經「死亡」的海蝕隙。

泊在海堤上

見天氣開始轉壞，趕快下一站：高爾夫球會，高爾夫球會位於成個清水灣鄉村俱樂部之顛，即最高處，景觀最好，沿途都係高爾夫球場的果嶺，果嶺唔止一片草坪，仲專登整咗幾個小湖／水池點綴，高低起伏，盡收眼底。

清水灣鄉村俱樂部係會員制，平時係私人重地，不能進入，如果大家想參加「全民運動日」，就要跟貼清水灣鄉村俱樂部的Facebook啦！

有用資料: 

1. 清水灣鄉村俱樂部

地址：清水灣大坳門路139號

Facebook：https://www.facebook.com/ClearwaterBayGolfCountryClub/

網頁：https://appit.cwbgolf.org/