瞳遊樂 (八十後香港家庭的親子旅遊blog): 【日本、東京、草津溫泉】2016東京+草津溫泉7日6夜聖誕卡通親子遊～「Day6：新宿站周邊散策-Yodobashi、和幸豬扒、博多天神拉麵、磯丸水產」

瞳瞳爸爸進度有點慢，因為實在好多野想介紹比大家 =)

於是今次我地一次過將四樣野寫哂：

Yodobashi新宿西口本店(Shinjuku West Main Store)：日本一間好出名的商店，我會叫佢為百貨公司，因為佢真係有好多不同種類的貨品售賣：由衣服、文具到家電、電玩、玩具都有。小朋友鍾意玩具，咁瞳瞳爸爸就介紹玩具呢part啦！

和幸豬扒：日本國內最大炸豬排專賣店「和幸炸豬排」。瞳瞳一家誤打誤撞之下，親身食到有幾好味，「和幸」仲提供兒童餐，瞳瞳去到特別開心。

博多天神拉麵：宵夜推介，抵食、好味！

磯丸水產：我地成個日本行程的最後一個晚餐，梗係食好D。扇貝竟然同手掌一樣大！

＜瞳遊樂＞逐個逐個介紹，開始。。。。。。。。。

Yodobashi（新宿西口本店）

去開日本旅行的朋友都知道Yodobashi，瞳瞳爸爸會叫佢做一間大型的百貨公司，因為佢有好多不同種類的貨品售賣，由衣服、運動用品、文具到家庭電器、電子遊戲玩、玩具、BB用品都有，而且佢分店遍佈全日本，大城市一定會有佢踪影，好似我地2015年跨年，就去過位於大阪梅田的Yodobashi。

平時我地係日本其他城市所見，每間Yodobashi舖面非常大，往往佔據幾層，甚至係一幢的建築物。 但位於東京新宿的新宿西口本店更加誇張！！佢係由幾幢相鄰的建築物形成「Yodobashi群」，用英文字母及貨品種類分為A、B、C、D、E、F、G、H、I、J及K，共11個分館！(下面附有地圖)　大家行呢堆「Yodobashi群」時侯會係呢幾條街之間穿越。知道大家都係親子遊，所以我地會介紹K館，就係賣玩具模型既地方，但只係K館，都有5層樓高！勁！

Yodobashi新宿西口本店，用英文字母及貨品種類劃分為A、B、C、D、E、F、G、H、I、J及K，共11個分館

「Yodobashi群」

呢度就係K館，好容易認，門口有一排扭蛋機就係。K館樓高5層：地庫B1係賣對戰遊戲卡、古董玩具；地面1樓就係賣GAME同電子遊戲機；2/F係首辦模型，例如高達等；3/F以模型車為主，特別有個叫做鐵道模型；4/F 小朋友專區，男仔有Tomica車、機械人、戰隊，女仔就有煮飯仔組合玩具、barbie、毛公仔、迪士尼公主等；5/F就主要係嬰幼兒玩具。

樓商５層，建議由最高一層慢慢行落黎。

當時最HIT既復刻版迷你紅白機，可惜已售罄，最近(2017)仲話停產了。

5/F 嬰幼兒玩具

Tomica車仔區

鐵道迷、火車迷的朝聖地

和幸豬扒（和幸MYLORD新宿店）

講起呢間「和幸豬扒」，我地係誤打誤撞搵返黎：話說我地一家去完東京迪士尼，搭火車返到新宿已經晚上八點幾，於是在新宿駅南口附近搵野食。我地行到一幢叫「MYLOAD」的大廈，本身底座係新宿駅南口，大樓每一層都有不同的食肆，我地逐層逐層睇，一直行到8樓。起初為了瞳瞳，想找一間有兒童餐供應的餐廳，見到「和幸」，門口只得數人排隊，又有兒童餐，所以也就跟住排隊，好餓了。

等位了大約用左20分鐘，坐下來看到餐牌介紹，才知道呢間舖頭大有來頭。「和幸」在日本有超過250間分店，佢地最出名的獨特料理「炸豬扒」，起源於距今一百年以前西式餐館的人氣菜單——Pork cutlets，當時的烹調方法最先只是塗上豬油或奶油加以煎熟，不久後即演變為炸天婦羅一般，以油炸的方式來烹調。

唔好睇少呢度所謂既墊底菜－「高麗菜」，係專門去揀選，所以見到當地人係會食埋墊在豬扒底下的菜。當中「白飯」、「高麗菜」同「味噌湯」可以無限續添。最後我地柯打左一份「雙人套餐」同「炸豬排兒童餐」。

在日本食兒童餐最開心，因為可以比小朋友任揀玩具，呢度可以比我地揀一份玩具＋一份零食，瞳瞳最開心！

兒童餐有：腰內肉一口炸豬排、炸蝦、薯條、果汁、餅乾、玩具，瞳瞳一個人可以食哂！

心大心細揀禮物

兒童餐來了！

我地既「雙人套餐」都黎啦：腰內肉一口炸豬排×2片、炸蝦×2隻、起司炸豬肉餅、青紫蘇炸雞胸肉排、茶碗蒸×2碗、白蘿蔔沙拉、非酒精飲料或啤酒×2杯。腰內肉炸豬排係選用脂肪少且肉質柔嫩的腰內肉，是和幸的招牌商品之一，必食！

講返豬扒，咬落去好脆，入面好鬆軟，唔會炸到乾哂，而且一點油膩感都無，伴住醬汁同高麗菜，真係好好食！

博多天神拉麵（新宿東口駅前店）

夜晚安頓好一切，瞳瞳爸爸鍾意一個人再係酒店附近行下，加深對附近地方認識，認下路。呢晚我打算圍住新宿駅行一個圈，在新宿駅東口近歌舞伎町的位置，就遇上「博多天神拉麵」。

「博多天神拉麵」全國都有分店，呢間分店係24小時營業，絕對係宵夜的好選擇，門口有塊介紹板，中、日文對照，圖文並茂，旁邊更寫上邊樣係NO.1, 2, 3，對於無特別喜好的人來說，絕對係好好的參考意見。瞳瞳爸爸叫左個NO.1的「蔥紫菜叉燒肉拉麵」，1000 yen，已經係全店最貴，但對比返我之前酒店附近的「屋台」都700~800 yen碗拉麵，好似又差唔多。

甫進店，極想坐Bar檯感受一下，可惜已經滿座，於是店員安排我坐一角，還好，可以看到整個鋪頭的運作。麵端上來，同圖有九成相似，而且好有心思，先用大紫菜舖滿碗邊，然後才放上招牌豬骨湯，叉燒約有4~5片，配上玉子，就咁睇已經好豐富，如果你好似我咁鍾意食蔥，就真係一流啦！個麵好好味，豬骨湯濃郁但唔肥膩，唯一嫌叉燒片得太薄，厚D會更加好味！

瞳瞳爸爸揀左個NO.1的「蔥紫菜叉燒肉拉麵」

分店地方不大

蔥紫菜叉燒肉拉麵，好好味

磯丸水產（新宿南口店）

離開日本的最後一天，瞳瞳一家決定食餐好的！我地新宿入住的「新宿燦路都廣場飯店」同「新宿駅」之間，就有呢間「磯丸水產」。「磯丸水產」同樣都係全日本都有分店，而且算係價格平。以我地呢間分店為例，入面就佈置到好有居酒屋feel，置身其中，自己都忍唔住要叫杯啤酒飲下。講下呢度有咩食先，真係好多元化架，佢叫「磯丸水產」，海鮮水產係佢招牌菜，特別係「活貝燒」，即係比個爐你自己生燒貝類，之後仲有燒肉、燒魚、刺身、伴酒小食、炒菜、熟食、炸物、飯類、甜品，真係應有盡有。

店員雖然忙碌，但亦好照顧你燒的東西，久唔久會過來幫你翻一翻，同埋教你點食。最後佢地肯同我地影合照，招呼好好，好有氣氛！