泰國總是給人一種陽光與海灘的感覺，對上一次來布吉，已經係11年前，啱啱南亞海嘯之後，人人都有陰影，唔敢去布吉玩，當時有一個唔怕死的領隊，帶住個唔怕死的團友，就係咁樣認識啦！
11年後，我倆已經結婚，又有女兒瞳瞳，所以今次行程唔多唔少都為左重遊舊地。
原來這11年間，
布吉一切變化太大了。。。。。。
在香港時候，已經請MAN哥代為安排蛋島半天遊（可參考：2016 七日六夜泰國布吉親子遊攻略 - 「Man哥」安排接送及活動篇）。布吉有好多外島可以玩水，今次係瞳瞳第一次出島，我又唔知佢適唔適應快艇同大風大浪，所以Man哥就建議我地去蛋島，航程較短，沙灘的魚比較多，適合有小朋友／長者同行，於是我地就同Man哥報左個蛋島半日團，半日其實已經好夠玩。(對！之後證明呢個決定無錯！)
蛋島3島行程如下：
約07:30am出發酒店車接送(約50min車程)
09:00am開船(15min快艇)島上自由活動
10:30am-11:00am安排出海浮潛50min
約12:30am回航，返到酒店約14:00pm-14:30pm
費用包括: 酒店來回接送/快艇接送/水果-小點飲品/出海浮潛50min/浮潛工具/保險
成人900b/位，小童 700b/位 (3歲或以下免費)
偏遠酒店需加每位1-200b Mai Khao 需獨立接載 1200b私家車 來/回
所以我地三人的收費就係：大人 900b x 2 + 小童 700b = 2500b
Man哥安排我地係自己酒店大堂0745-0800等候出發，一朝早快快係酒店食個早餐，再向酒店泳池bar-「Velcet Pool Bar」度拎毛巾出海，出街的毛巾是藍色的，千其唔好拎房間入面純白色的毛巾！用完之後就要拎返酒店交還。外島遊建議除團費外，只需帶少量現金，船上及島上不設保險箱服務，其他沙灘用品如毛巾 / 相機 / 防曬油等要自備。
我地好準時0745乖乖在酒店等侯，因為接載我地既VAN仔係之前去左幾間酒店接客，為免影響他人，「等人好過人等你」的心態下，所以寧早莫遲。無幾耐有個泰國人司機用廣東話嗌「蛋島蛋島」，我就上前示意，亙相再核對一下名字，就上車出發啦！
車上已經有兩個Party係度，我地第三個，之後去多兩間酒店接多兩個家庭，先真正去碼頭，所以車程都差唔多50分鐘。
 |
| 坐van仔出發！ |
大約會分為三個部分：第一個島會逗留半小時，主要遊水；之後到第二個島外面停船玩浮潛；最後在另一個島停留一小時，有魚仔睇。
 |
| 去到碼頭入去登記 |
 |
| 今次導遊「祥仔」（白色圍巾），因為中國遊客多，佢會講普通話。 |
 |
| 今次去的三個島(實際兩個，因為浮潛不靠岸) |
 |
| 好留心聽書喎~ |
航程大約20分鐘，上到船，首先每人會分到一件救生衣，小朋友亦有小朋友Size的救生衣，記住為了安全，人人都要著救生衣啊！拿，講真，快艇出海一定會有點拋，「完全唔拋」就呃你既，所以有暈船浪的朋友仔記得食定暈浪丸，而且會有少少浪花打入船內，一定濕身。航程中導遊祥仔會講下集合時間，為免大家誤會，佢地會寫係個白板到。當日見到大海有一半天黑沉沉，我亦望到天黑果邊正落緊大雨，風浪都幾大，之後仲落雨添，大事不妙。。。。。。
 |
| 我地的快艇 － 「９２」 |
 |
| 出發前，風和日麗 |
 |
| 半路中途大風大雨 |
終於到左第一個島 － Khai Nai Island，今日天公不造美呀！我地先在船上遇上風雨，上到島雨勢仍未減弱。大人已經好狼狽，最麻煩！最麻煩！最麻煩的係怕瞳瞳「攝」親，我地唯有將酒店的毛巾包住佢。
記得十一年前呢度係白色粉砂，好柔軟，好似麵粉咁。不過今次嚟到，就真係有Ｄ失望，個島面積感覺好似細左，砂再無咁幼，而且好鬼大浪，果日天氣同海面情況都唔好，唔適合落海，所以我只能和瞳瞳沾沾水，在沙灘玩下。
 |
| 遠景天黑黑 |
 |
| 真係好大浪，瞳瞳你要攬實媽媽呀～ |
不過做人要執生，邊會樣樣事都順心丫～瞳瞳在沙灘玩沙，又識到另一位大姐姐，佢同樣都係香港人，大姐姐在島上搵到一隻唔怕人的貓仔，仲抱住同瞳瞳分享同玩，瞳瞳在泰國又識到同聲同氣的朋友仔。
 |
| 泰國Ｄ海水含沙量幾高，只要沾到海水就會有沙 |
大約逗留４０分鐘，我地就上返船啦，準備出發去浮潛，呢個時候導遊祥仔向眾人表示，天氣同海面確實不適合進行浮潛，安全起見，所以建議取消，改為提早去到最後一個島，而逗留時間會延長番。其實果時我心裡暗暗叫好，因為咁既環境瞳瞳未必頂得住，我都寧願快去快走，幸運地，沒有人異議，眾人就跟導遊的安排！
大家又再一次落船，導遊先安置我地在一間島上的餐廳，都算係室內地方，如果要租用沙灘椅就收100b，因為我有旅行袋要擺，唯有比錢租張沙灘椅。之後導遊同工作人員就開始派三文治、水果咁，團友可以任食。呢個島的風浪比對上一個已經無咁大，瞳瞳在淺水邊都已經有好多魚仔游黎淨去，魚仔係「黃色熱帶魚」、「青衣仔」咁，好似置身小型水族館咁，而且魚仔一D都唔怕人，佢仲以為係有野食係咁「啄」你添～
而上一個島見到既姐姐，我地又再遇上，可見其實大家行程都係大同小異，大家一齊睇魚，好開心呀！
 |
| 係咪好多魚呢~ |
之後我地回到碼頭，由工作人員安排我地上車返酒店，收到酒店，剛剛1430。
 |
| 買左幅相當紀念品 |
出島注意事項：
１ 買保險
２ 千其唔好拎房間入面純白色的毛巾！酒店布出島用的先巾，出發前可以各酒店借用，記得要保管好交還。
３ 外島遊建議除團費外，只需帶少量現金，用來買額外的飲料、租借設施等。
４ 有暈船浪的朋友仔記得食定暈浪丸
５ 沒有「碼頭」的設施，出發時穿定短褲、拖鞋，快艇駛到淺水處，再以「搶灘方式」登岸
報名可看以下詳細：
2016 七日六夜泰國布吉親子遊攻略 - 「Man哥」安排接送及活動篇：http://tungbama.blogspot.hk/2016/08/2016-man.html
延伸閱讀：
2016 七日六夜泰國布吉親子遊攻略 - 準備篇
2016 七日六夜泰國布吉親子遊攻略 - 「Man哥」安排接送及活動篇
2016 七日六夜泰國布吉親子遊攻略 - 住宿篇 - 活在天堂日與夜的「Paresa Resort Phuket」
2016 七日六夜泰國布吉親子遊攻略 - 住宿篇 - 擁有全芭東最大的酒店泳池「Novotel Phuket Vintage Park」
2016 七日六夜泰國布吉親子遊攻略 - 玩樂篇 - 蛋島半日搶灘風雨團
2016 七日六夜泰國布吉親子遊攻略 - 玩樂篇 - 騎大象之旅
2016 七日六夜泰國布吉親子遊攻略 - 飲食篇
2016 七日六夜泰國布吉親子遊攻略 - 行街購物篇
2016 七日六夜泰國布吉親子遊攻略 - SO THAI SPA
👍👍
回覆刪除