 |
媒體報導轉載本文：2017/6/12 |
瞳瞳話好想住酒店，因為未來生小B階段，我地都主力留港，暫時停一停唔飛住。但唔緊要，香港咁多好去處，我地就好好留係香港，發掘香港好去處。
於是我上網搵下本地酒店資料啦，發現位於大嶼山梅窩的銀鑛灣渡假酒店，佢地有一個生日慶祝優惠推廣，如下：（2017年5月，一切資料以銀鑛灣渡假酒店為準）
 |
| 5月生日優惠 |
各位爸爸媽媽可能會問：「究竟仲有無其他額外錢要比呢？」例如想要海景房就要 +$300/晚，仲有半自助晚餐同自助早餐包兩位成人，如果3歲以上小朋友要付錢，不過餐廳方面都有小童價，而且住客會有折扣，我記得我地都係比多百零蚊就可以了。
於是我地就準備向大嶼山梅窩的銀鑛灣渡假酒店出發！
梅窩。。。真係同廣告歌一樣：「去旅行，搭車又搭船～～～」我都好耐無去過，提早係學校接走瞳瞳，於是由大圍的學校開始，搭火車、巴士、船，終於到梅窩啦！
由中環港外線碼頭（六號碼頭）出發，搭新渡輪去梅窩，有分「快船」同「慢船」，時間上「快船」約半小時多D，「慢船」就大約40分鐘，價錢亦相對「快船」較貴。
新渡輪 中環港外線碼頭（六號碼頭）＞梅窩 船期及收費如下：http://www.nwff.com.hk/route/get_route.php?id=df056ac0-ac9e-4813-ba89-928c441dfec6&route_id=7&submenu_num=3&lang=zh-hk
 |
| 我地一陣就係坐呢班新渡輪「快船」入梅窩啦！ |
 |
| 沿住海邊一直行 |
 |
| 近年新起的行人路，好行好多，以前要人/單車爭路 |
 |
| 遇上大龜散步 |
 |
| 已經可以見到銀礦灣沙灘同埋銀鑛灣渡假酒店 |
我地終於到達銀鑛灣渡假酒店啦！影張相先，再在酒店大樓旁邊進入接待處。職員好快就幫我地辦理check in 手續，各位記得帶定身分證明文件去證明個生日優惠，仲有做booking既信用卡，之後就同我地講解一下酒店設置、用餐位置及派發餐劵。
房間篇
好啦！最期待就係房間啦！銀鑛灣渡假酒店樓層唔高，我地住「主樓」呢邊，就只有兩層樓高，今次住海景房（+$300），在一樓位置，只需行上一層就可以。
原來銀鑛灣渡假酒店做過翻新工程，所以無論走廊同房間都好新淨！感覺好好！一推開房門，房間面積好大，一張雙人床整理得好好！先去窗邊睇下個view先，嘩！無敵大海景呀！一塊過的玻璃窗，令你放心保安的問題！
電視、雪櫃、電水壺、風筒、熨斗等等都應有盡有，絕對係酒店規格，洗手間係淋浴方式：毛巾、牙膏牙刷、沐浴液、洗頭水、潤膚露等等設備都應有盡有！正！
 |
| 房間乾淨、企理 |
 |
| 洗手間都好乾淨 |
 |
| 淋浴間 |
 |
| 好開心呀! |
玩樂篇（銀礦灣沙灘）
好多人覺得梅窩無咩野玩，又或者一嚟到梅窩就已經跳上巴士去寶蓮寺、大澳等地。其實我覺得不妨細味一下當地風情：你可以行返出去碼頭位置。猶如一個小市集，餐廳、大排檔、酒吧各適其適，任君選擇；鍾意遠足行山的，可以去酒店後面的白銀鄉，山徑可以到銀礦洞、銀礦瀑布，花兩小時仲可以翻山到白芒（北大嶼山）或是到愉景灣（瞳瞳爸爸提提你：遠足行山需有充足準備）。
當然，咁近一個銀礦灣沙灘，點可以浪費呢？由酒店出去，只係2至3分鐘路程就到沙灘。銀礦灣沙灘好大好大好大，但大家都唔好樂極忘形，記得去返有防鯊網位置先玩，同埋有救生員可以照顧大家。瞳瞳玩得好開心，因為平時去泳池多，好少有海水可以游，當日水的質素就一般啦！不過見佢比浪衝下衝下，好好玩好開心，有時侯又上岸掘下沙，捉下魚仔，仲好快識到位大姐姐做朋友一齊玩添。
 |
| 銀礦灣沙灘 |
 |
| 沙灘面積好大，一D唔迫人 |
 |
| 老婆，生日快樂！ |
飲飲食食篇
夜晚，大肚瞳瞳媽媽下班後也入來了，我地先到碼頭接佢，然後帶佢返酒店。
餐廳位置就係地下，今晚係包兩位半自助晚餐，因為我地三個人，所以要額外叫多份餐，如果三歲以下的小朋友就唔駛。不過都抵食既，晚餐有小童價，但有大人的份量。我地先揀主菜，點了豬鞍、羊架同西冷牛扒，雖然無飯或意粉配上，但份量好大好足，羊架都有3大隻；豬鞍要大讚，好出色好好味；牛扒相對前兩樣就失色一點，味道不過不失可以「珠玉在前」吧！
自助果part有凍肉、凍蝦、沙律、鳳爪、煙三文魚、西湯、甜品等，味道唔錯，而且新鮮，仲見到職員都不斷refill，唔會話無野食。
 |
| 尚算唔錯 |
 |
| 甜品都OK！好多選擇。 |
 |
| 好厚的羊扒，三大塊 |
最後在晚餐尾段，我地換埋個生日蛋糕比瞳瞳媽媽，第一次算一家四口慶祝生日(連埋肚入面小B)。Happy Birthday！
 |
| 瞳瞳媽媽生日快樂！ |
 |
| 檯墊係一張卡通版的梅窩地圖 |
游泳池 篇
泳池可以分為兩個：一個大池和一個兒童細池，毛巾可向泳池邊的職員取，用完記得還回泳池。同小朋友輕輕鬆鬆，游完咸水(銀礦灣沙灘)又可以游淡水(泳池)。玩到盡！開心哂！
 |
| 呢個滑梯玩得好開心 |
戶外公園篇
其實酒店都有一個好靚既花園，似乎好適合用嚟做婚禮。日頭同夜晚都不一樣，晚上會加埋好靚的燈飾，瞳瞳仲客串做攝影師，幫我地兩口子影左好多相添。
後記：今次銀鑛灣渡假酒店之旅，瞳瞳一家非常滿意，首先佢位處梅窩，係我地都市人平時好少去既地方，反而有種新鮮、悠閒感覺；而零距離的沙灘，真係好方便我地一家大細去玩，返酒店又近；而且酒店包埋晚餐，無煩惱，而且質素也好。講真，寧願佢包個晚餐我地就可以唔駛出去碼頭搵野食，啱哂扶老攜幼的家庭。
有時睇網上的評論，都唔及親身感受好，而且好個人感受，瞳瞳一家就非常滿意，推薦比大家。
1. 銀鑛灣渡假酒店
地址：香港大嶼山梅窩銀礦灣 D.D.2 地段648
熱線: (852) 6810 0111
傳真: (852) 6810 0222
電郵: info@silvermineresort.com
2. 新渡輪航班時間表（中環(六號碼頭) - 梅窩）
熱線: (852) 2312 6111
沒有留言:
張貼留言