【香港本地親子遊】那些年香港情懷「九巴辦館」@D2 PlaceONE(活動已完結)

大部分小朋友都鍾意車仔，瞳瞳爸爸都一樣，好鍾意玩具車，特別係平時接觸到既交通工具，例如巴士、火車咁。就因為細個會搭到、日常生活成日會見到，所以特別鍾意。到後來在社會工作，都有幸係九巴工作過一段時間，識左好多朋友仔，真係好開心！

九巴係全香港最大的巴士公司，近年公關宣傳工作都好努力，不斷提升形像，特別係用香港情懷做主題，令到我地每一個香港人都好有 feeling～今年暑假，由即日起至8月31日期間，每天中午12點至晚上9點，九巴在荔枝角 D2 PlaceONE二樓THE SPACE搞左一個叫「九巴辦館」，咁有D咩好玩呢？瞳瞳一家早幾日親身去玩左一轉，而家話比大家知～

首先帶大家搵呢個地方先，係荔枝角 D2 PlaceONE，下圖橙色框就係，近長沙灣港鐵站D2出口，千其唔好去錯紅框的D2 PlaceTWO，係兩個地方嚟！

去到D2 PlaceONE，上兩層扶手電梯再向前行少少，就見到＜九巴辦館＞，門口打扮成昔日辦館士多一樣。

九巴辦館正門

一去＿就會見到好多九巴精品，包括：環保袋、巴士站牌咕臣、九巴仔公仔、大大小小的巴士模型、玩具等～

不同類型的九巴精品

當年行走九龍城啟德機場既第一代豪華機場巴士

「九巴珍‧文物館」：佢會不定期轉換不同年代的巴士相關歷史藏品及珍貴舊香港歷史相片，

今次我地去就見到以前巴士公司職員的制服、徵章、數銀仔的盤，仲有巴士錢箱。呢D都係平時難得一見的展品，而家仲可以近距離欣賞。

「的達」跌錢。。有聲

呢度就係「九巴仔影樓」：大家只要係頭先辦館幫襯買任何產品（不限價錢），就可以問店員拎張「借衫證」，在辦館門外有一個重現舊香港巴士站連街道場境，大家可以穿上那些年九巴制服，影張香港情懷舊照。

我地都買左少少野，所以揀左兩件制服影相，好正呀～果度的店員好nice呀！ =)

變身成為昔日巴士公司職員

仲有免費貼紙拎，只要大家在facebook 讚好(like)九巴專頁 或者 follow九巴instagram kmbhongkong ，之後將手機俾在場職員睇，就可以免費得到卡通巴士貼紙啦！

 其實地方唔太大，大約半小時就可以行哂，不過D2 PlaceONE同D2 PlaceTWO都好多野行，以衣服服飾、精品為主，介有好多本土自家的創意產品值得支持下，而且場內亦有唔少餐廳可供選擇。D2 PlaceTWO 就係近來好出名的＜大樹先生的家＞的位置，但記住佢地係兩個不同位置，不能相通。

在九巴辦館門口就係呢個懷舊的情景，當中$5熱狗同免費玩遙控船的攤位都不能錯過。^^

機會難逢，暑假約埋朋友仔屋企人，同九巴一齊走入時光隧道，體驗那些年香港情懷～




有用資料: 

1. 九巴辦館

日期：2017年7月1日至8月31日

時間：每天中午12點至晚上9點

位置：荔枝角 D2 PlaceONE二樓THE SPACE

網頁：http://www.kmb.hk/tc/news/press/archives/news201706272536.html

交通：港鐵長沙灣站D2出口

如果想搭巴士去玩先夠原汁原味，仲有以下巴士路線參考:
💁彌敦道出發：6（📍長沙灣長荔街下車）
💁九龍東出發：40/214（📍長沙灣長荔街下車）
💁大埔出發：72（📍長沙灣長荔街下車）
💁沙田/馬鞍山出發：86/86C（📍長沙灣長荔街下車）
💁港島出發：102/171/904/905（📍長沙灣長荔街下車）
💁荃灣出發：30X（📍大南西街下車）
💁屯門出發：58X/59X/66X/67X（📍荔枝角鐵路站下車）
💁元朗/天水圍出發：68X/69X（📍荔枝角鐵路站下車）