【香港本地親子遊】【荃灣汀九】被遺忘展覽館系列(二之一)機場核心計劃展覽中心

香港有好多博物館／展覽館，因為位置或交通配套不便等等的原因，而唔係太多人到訪，久而久之漸漸「被遺忘」，今次我地分上、下兩集，介紹兩個展覽內容十分相似，但位於兩個地方，卻又遙遙相對的展覽館：分別係「荃灣汀九機場核心計劃展覽中心」及「青嶼幹線訪客中心」。

我地呢集先介紹「荃灣汀九機場核心計劃展覽中心」

機場核心計劃展覽中心官方地址係新界汀九青山公路401號，其實簡單咁講就係帝景酒店過少少啦！

我地數返九十年代，都二三十年前咁滯，香港展開玫瑰園計劃，發展大嶼山同籌備興建新機場，亦即係之後的機場核心計劃～

當中的十大核心工程有：

1. 新機場 

2. 機場鐵路

3. 青嶼幹線

4. 西區海底隧道

5. 北大嶼山快速公路

6. 三號幹線

7. 西九龍快速公路

8. 西九龍填海計劃工程 (瞳祈爸爸按：現時圓方、九龍機鐵站一帶)

9. 中區填海計劃第一期工程 (瞳祈爸爸按：現時中環碼頭一帶)

10. 東涌新市鎮(第一期)

我地今次參觀機場核心計劃展覽中心，當日都幾曬下！展覽館於1996年啟用，我記得當時有不少市民到來欣賞大橋工程，而且亦係好多本地旅行團熱門行程之一，多人到爆！工程完成，而大家亦可以親身直接去新機場，唔再需要「遠眺」，人流自然減少好多！

機場核心計劃展覽中心其實係利用咗一幢原名叫「白樓」的三級歷史建築物，由印度商人J·H·律敦治在1930年代初期建造，當時為香港啤酒廠有限公司在深井興建香港首座釀酒廠，並且興建白樓作為別墅，後來被香港政府購入作為公務員宿舍，七十年代財政司夏鼎基曾經入住。

兩姐弟，手牽手

中心係免費開放，不用入場費

展館分兩層，地下的一層冷氣開放，分為五個部份，簡單介紹機場核心計劃，展覽品有些按鈕可以給遊人按掣發光～另備有一個視聽室，播放有關工程計劃的介紹。

「新機場的模型」～不過我諗大家都唔駛睇模型，都已經「親身」去過好多次～

介紹機場快綫的部份，估唔到已經係二十年前既事，最深刻我反而都係黎明的<HAPPY 2000> MV～哈！

當中介紹青馬大橋，因為係最大的工程，亦係世界級的工程，所以篇幅相對較多，有好多唔同比例的模型去介紹

上面行車，下面行鐵路，就係青馬大橋的其中一個特色～

然後我地上二樓天台

呢度設置咗有幾台望遠鏡，可以欣賞青馬大橋景色，亦係睇風景最靚既位置！

 機場核心計劃展覽中心地方細細，其實大約30-45分鐘就可以行哂，入面有詢問處同洗手間，不過糧水自備啦，展覽中心外面都有停車場泊車，附近最就近補給就係帝景酒店，不然就要搭巴士出荃灣或深井。


如果你係自駕揸車的話，機場核心計劃展覽中心及青嶼幹線訪客中心及觀景台兩個地方可以共遊，在荃灣同青衣之間遊走，遊下車河，過下揸車癮！！


下一篇我地會介紹另一個被遺忘展覽館系列(二之二)：「青嶼幹線訪客中心及觀景台」

有用資料: 

1. 機場核心計劃展覽中心

地址：新界汀九青山公路401號

開放時間：
星期二至五（上午十時至下午五時）
星期六、日及公眾假期（上午十時至下午六時半）
中心於公眾假期照常開放（包括列為公眾假期的星期一），元旦、農曆新年及聖誕假期除外
網頁：https://www.info.gov.hk/archive/napco/c_exhibition.html

交通：

巴士：

九巴234B（來往荃灣西站及浪翠園）或 53來往元朗站及荃灣（如心廣場） ，下車站為「海美灣」

綠色專線小巴路線 ： 

96 來往荃灣（海壩街）及青龍頭 

96C 來往荃灣站及碧堤半島 

96M 來往荃灣站及青龍頭

302 來往葵芳（葵涌廣場）及青龍頭（豪景花園）