「尖沙咀」作為我地香港「傳統遊客區」，以前細個既感覺就係：尖沙咀有好多酒店，酒店的大堂都好靚，感覺非常高級，仲有好多外國人添....
香港本地的酒店我地都住過好多間，而＜瞳遊樂＞都介紹過好多，近日趁香港的酒店房價急降，乘機支持一下本地酒店，於是我就網上睇下，終於可以夢寐一試尖沙咀區的酒店 — 馬哥孛羅香港酒店～ 我知道有不少外國朋友都有留意我地個Blog，所以今次都介紹返遊客區的酒店啦。
馬哥孛羅香港酒店位於尖沙咀廣東道，其實在海港城商場上面有一系列用「馬可孛羅」命名的酒店，由尖沙咀天星碼頭五支旗杆向中港碼頭方向以次序數過去，分別係：馬可孛羅香港酒店（近天星碼頭）、港威酒店同太子酒店（近中港碼頭）。
今次我地住的馬哥孛羅香港酒店，正正就係最近天星碼頭、尖沙咀碼頭巴士總站、星光行果邊果間。
酒店一共有兩個出入口，一個係廣東道對住1881，另一個就近天星碼頭、海港城入口。海港城呢個大電視，大家一定有印象，至於入口就在右手邊，扶手電梯前～
由門口影返出去，見到天星碼頭同維多利亞港，你地睇下有幾近！
因為位置好，入住旅客亦多，都要排隊check in，但職員非常勤快，唔駛等好耐就到我地。職員姐姐知道今次我地係為豬小B慶祝生日，主動為我地升級「豪華客房」（哈哈，。多謝豬小B），仲話一陣送小蛋糕俾我地添！呢個驚喜令我地非常開心同難忘。
雖然馬哥孛羅香港酒店已經開業一段時間，有資歷的酒店，但維修保養得宜，唔感覺到有「老態」
打開房門，豪華客房超級大！
門口的左手邊，有一個小小空間，擺行李箱、迷你酒吧都係呢度！連我地的BB車都不用摺起，可以一直保持打開的狀態。
放置行李箱，或者換下鞋都得～
迷你酒吧、熱水壺、咖啡、茶包、小雪櫃等等，部份要收費～
我地係雙床房，不過床好大，夠哂我地瞓，床褥同枕頭都好舒適！
地方大到仲有空間放張書檯添
至於浴室係「浴缸＋花曬淋浴」
酒店提供的沐浴用品
洗手盤就放在外面，方便瞳瞳祈祈兩個小朋友洗手 ～
個人護理用品都好齊全
分享一個小秘密，雖然我地係市區景，但可以穿過文化中心同太空館一樣可以望到少少海景架！
日與夜的尖沙咀
今次係幫豬小B慶祝生日，酒店仲主動送小蛋糕俾我地添！
酒店其實都有其他設施，游泳池(6/F)同24小時開放的Gym room(4/F)。
游泳池都幾深水下，一落水已經1.5米水深，雖然有救生員，所以小朋友一定要跟大人，而太細的小朋友我都唔建議落水，游泳池開放時間每日上午7:00至晚上7:00。
無論你係來港旅客還是本地香港人，位於九龍尖沙咀的馬哥孛羅香港酒店，絕對係方便之選，尖沙咀有幾方便大家都知，如果要到香港島的話，不妨搭我地百年歷史的渡海小輪，可以去到中環及灣仔。酒店3/F本身都同星光行及海港城連接咗，打風落雨都唔駛擔遮都可以Shopping！附近景點同行街的地方亦多，太空館、文化中心、鐘樓，1881、廣東道、K11 Musea.....等等，非常方便！
我地就帶住瞳瞳祈祈，待人流唔多時，夜晚行下海港城，入面有玩具反斗城，行到閂門先走，順路去埋冒險樂園玩，玩完先上返房休息～
1. 馬哥孛羅香港酒店
地址：九龍尖沙咀海港城廣東道3號
電話：2113 0088
沒有留言:
張貼留言