瞳遊樂 (八十後香港家庭的親子旅遊blog): 【日本、那須鹽原】親子5日4夜自駕賞雪之旅～完美演繹日式親子酒店Hotel Epinard Nasu

2020年1月8日星期三

【日本、那須鹽原】親子5日4夜自駕賞雪之旅～完美演繹日式親子酒店Hotel Epinard Nasu

那須鹽原以前係日本皇室度假的地方，直到今時今日，日本人都鍾意嚟呢到度假。我地所講的親子酒店，一般以房間設施便利小朋友為主，但今次嚟到那須鹽原Hotel Epinard Nasu，酒店簡直係完美演繹日本人的親子慨念，所有設施及服務都完全合乎大人和小朋友的需要，只恨我地太夜到達酒店，未能盡用設施。

先講我地由東京成田機場，再去租車公司取車，已經大約下午5時，然後根據GPS計算，我要開2小時45分鐘車程才到達那須鹽原的第一晚酒店Hotel Epinard Nasu。車子沿住「東北自動車道」一直衝去目的地，當中經過宇都宮（名物：餃子），不過我事前在酒店訂了聖誕節自助餐，就無在公路服務站停低休息睇嘢，唯有特急，兩個小朋友好乖，一直好好地安睡，沒有嚷著要上洗手間，而老婆就一直在旁邊陪我傾計，原來落完機直踩真係好累好累好累！勁放蚊，好彩有佢陪伴。。。。

Hotel Epinard Nasu在那須鹽原一帶嚟講算得上非常有規模，度假村形式運作，擁有當地最大規模的露天溫泉，仲有商店、餐廳、同類似香港冒險樂園的兒童Game zone等等，不假外求。

最終我用了2小時15分抵達酒店，追回不少時間，酒店外有一個大大停車場，提供免費車位，我地先入去大堂Check in～趁職員幫我地辦手續，我地就參觀一下大堂啦！

停車場日景

大堂空間非常寬廣，人多Check in都唔怕

今晚係聖誕節，大堂的裝飾好有氣氛

Reception有免費的化妝品試用裝任取

職員好快安排我地上客房啦！

房間比日本城市的酒店係「超級大」，客廳、卧室分開間隔。

客廳位置放了豬小B的BB床，非常貼心～豬小B總是喜歡爬來爬去～

酒店給客人享用的點心

洗手間空間大，又明亮，沖涼係淋浴形式～

大大小小浴巾以及備有不同尺碼的拖鞋

連浴衣都備有不同Size，大家可以先換上浴衣，在酒店範圍內活動或者去浸溫泉～

左至右：加濕器、熱水壺、冰水壺，浸完溫泉飲杯凍水都好正！

突然門鈴一響，有兩位日本嬸嬸入嚟，雖然言語不通，但比手劃腳大約知道：佢地問我地想唔想轉日式榻榻米，我地又不妨試下，佢地二人兩三下工夫手腳，就把客廳成為日式榻榻米床舖。不得不提，房間不但有暖氣，連榻榻米底下都有發熱。

客房提供無間斷暖氣，有時都會覺得幾焗促，酒店貼心地在玻璃窗下面有個透氣口，我地也是待了一整晚才發現～傻瓜～

早上起床，由客房望出去就見到那須高原。

見到嗎？山頂白白的，代表已經有積雪了。。。

介紹一下酒店的溫泉先，呢度有那須高原最大規模的露天溫泉，有三溫暖、檜木浴池、按摩浴池等，據說溫泉水對關節炎、肌肉酸痛等有功效，開放時間由早上4:30～10:00／中午12:00～凌晨1:00。（溫泉區不能拍照，相片撮自官網）

大型露天溫泉，四周用岩石砌

室內大浴場也相當寬敞，與露天溫泉相同的溫泉、泉質。

溫泉區門口前有一個賣工藝品的攤位

有個類似香港冒險樂園的兒童Game zone，好多小朋友去玩

大堂旁邊有一個商店，有好多手信、土特產可以買，之前介紹過，那須鹽原出名「雞蛋」同「牛乳」，呢度就有得賣。

牛奶的副產品：「芝士」都一樣大受歡迎

我一早預訂咗今晚在酒店餐廳享用聖誕自助晚餐，雖然那須鹽原係一個偏遠鄉郊地方，不過自助餐一點也不輸蝕，非常豐富，拍得住我地香港尖沙咀區酒店自助餐，食物種類非常多，而且酒店強調係用返那須鹽原本地農場、牧場的食材，令人感覺更地道、更加滋味～

即煎的宇都宮餃子

真係要大讚的一樣事：餐廳安排一個好大的「兒童取餐區」。兒童取餐區的檯子高度特別調矮，方便小朋友取食物，而係呢個兒童區入面全部都係小朋友餐具同食物盤。仲有所有食物都係適合小朋友，意粉、日式炒麵、燒八爪魚丸、玉子、天婦羅等等好多種類，由八歲瞳瞳到兩歲的豬小B都完全照顧到，再細一點的Baby呢？呢度連即食糊仔都有，非常非常之貼心！