2021年4月8日 星期四

【香港本地酒店】【沙田】2021復活節體驗@ALVA HOTEL BY ROYAL 帝逸酒店


上一次同大家去咗沙田現存歷史最悠久的酒店—「麗豪酒店」,今次就再同大家去沙田區最新、啱啱開業,位於沙田小瀝源可樂廠附近的「 ALVA HOTEL BY ROYAL 帝逸酒店」。

帝逸酒店差唔多成為近年最hit的話題,最主要係酒店入面個自助餐獲得一致好評,不過我地今次主力介紹酒店房,大部分家長都關心渡過一晚的房間,有咩需要準備?房間有咩設施?

帝逸酒店同沙田市中心「帝都酒店」同屬一個集團,大家唔會陌生,所以有一定保證。

我地今次齌BOOK房,幾百蚊就可以了,食方面要自己解決,好彩附近都方便,近既有愉翠苑、遠少少可以行去石門、沙田第一城,對我呢個「沙田友」來說完全沒有難度。

出發

酒店其實位於沙田小瀝源可樂廠、巴士廠附近,正正酒店旁邊都有一個巴士站「源康街」,真係只行幾步就到。


先去Check-in,酒店大堂係1/F,當日好多人入住,所以都大排長龍,不過酒店方面都安排返好多人手同窗口,大約排隊10分鐘。因為疫情關係,大家都要填健康申報表,比較奇怪係會要求大家出示「住址證明」以證明資料準確,當然沒有帶的話,簽一張聲明書就可以了。


酒店中間有一幅立體地圖,一眼就睇出係我地沙田區地圖,藍色係沙田海同城門河,而地圖唯一標示的地方就係酒店同麥理浩徑。


酒店大堂的一角叫做「Alva Works」 ,每日 24小時開放, 讓大家可免費使用電腦、工作長檯、舒適座椅、電子禮賓站,與不同人士建立共融社群,啟發新思維。


呢度仲有一堆食物自助售賣機、真橙榨汁機等,價錢都合理


好啦,我地上房啦!今次我地房間安排係22樓。

典雅的電梯大堂


今次我地有兩張床,新開張所以好新淨,無得彈。



房內一幅以沙田為主題的畫


帝逸酒店提供既 illy 咖啡機


呢度既飲用水,可以唔駛煲,行出去走廊,每一樓層均設配備NSF 42 及53國際驗證檢測過濾程式及監察系統的Well井智能添水站,又可以減少即棄膠樽。把客房內的專用水樽拎出去裝水,咁就隨時免費飲用潔淨的食水。

全間酒店房的燈光、電視轉台、調校冷氣,全部都可以由呢一部IPad控制哂,真係超方便!

洗手間乾淨企理


我問過酒店職員,基本上除左最高級的套房之外,所有房間都係無浴缸,只得淋浴。

但呢個淋浴都唔好睇少,佢係一個水療淋浴,聽講有助改善膚質,煥發精神。瞳祈爸爸一家就試過,同平時的水真係好唔同,佢係比較「軟」,有水力但唔覺痛,好舒服!

就連沐浴露都有分「日用」、「夜用」 XP

坐廁係分開,真正乾濕分離


到窗外的風景啦,我地直望沙田,而且高樓層,視野非常好,石門站同第一城兩個屯馬線車站都「同框」一次過睇哂。


祈祈睇得好開心,見住火車係路軌上走來走去。




酒店天台有個泳池,但疫情反覆,開放時間要先問酒店,我只可以影張相,夜晚真係幾靚。


我地只係淨book房,咁飲飲食食點好呢?位於酒店地下(G/F)的一田便利店「KONBINI 便利ストア by YATA」,就有唔同的弁當、手卷、沙律等等可以選擇,與其話係便利店,可以話係一間小型超市。仲重要有「天仁茗茶」,可以一解口渴。


我地都買了日式弁當和日式雪糕,一解無得去日本之苦。大家就咁可以在樓下買齊食物,唔駛出去買,不過要留意佢收得幾早下,收2000,而且最好早少少買,因為好多家庭都會來掃貨,不要太晚來。



ALVA HOTEL BY ROYAL 帝逸酒店始終係一間新酒店,所有設備都好新、好乾淨同企理,希望酒店可以keep住水準,最驚喜係個水療花灑,好舒服,非一般的淋浴享受!地下又有仿如小超市的便利店,真係一應俱全,特別係你唔想食自助餐,平平地只book間房都係一個唔錯選擇!


有用資料: 

1. ALVA HOTEL BY ROYAL 帝逸酒店

地址:香港沙田源康街1號
電話:3653 1111

網址: https://www.alva.com.hk/tc/index.html
電郵: info@alva.com.hk
交通:

1. 巴士
85X – 由紅磡(紅鸞道)巴士總站出發
89C – 由觀塘(翠屏道)出發
680 – 由金鐘站(東)巴士總站出發
682 – 由柴灣(東)巴士總站出發

2. 港鐵石門站B出口 + 步行8分鐘




沒有留言:

張貼留言