大阪奈良6日5夜親子之旅! GO !
4/8 酒店 => 地下鐵 => 大阪生活今昔館 => 天神橋筋商店街+天六食堂 => 地下鐵+近鐵 => 奈良東大寺+奈良公園 => 近鐵 => 高島屋百貨簡介、晚餐: 難波地下街鰻魚飯、宵夜特集:燒賣、拉麵、章魚燒
瞳瞳一家第一次到日本，我就梗係想幫瞳瞳 + 瞳瞳媽媽影輯靚靚和服相，原本計劃去京都影，但交通行程好遠，由大阪去京都要1小時30分鐘，二來借和服要好早到，咁先至會多款揀，三來天氣熱或下雨，都會令到佢地好辛苦。
於是我揀左「大阪生活今昔館」。。。。。。。。。。。
 |
| 簡單一點: 我地去左古裝街 |
朝早起身，今次去麵包舖買早餐先，試下日本麵包
 |
| 好好味既蟹柳條，便利店買108 yen |
跟住我地出發去「打大佬」，就係搭地下鐵既御堂筋線，御堂筋線係大阪最繁忙的地鐵線，好多人搭，推人上車關門就係佢啦!!
由
STEP 1「地下鐵難波（なんば）站」搭大阪市営御堂筋線(千里中央方向)到「地下鐵梅田/東梅田站」
STEP 2 「地下鐵梅田/東梅田站」轉大阪市営谷町線(都島行)到「地下鐵天神橋筋六丁目站」 (大阪生活今昔館 所在)
行程當中只需要轉1次車
|
 |
| 我地十點鬆少少出發，避開上班人群。 |
到達「天神橋筋六丁目駅」後，記得跟「3號出口」，而沿途都有指示牌，好容易搵!! 記住唔駛上地面，直接在地鐵站轉上3號出口之前，會有一對自動門，直接入去搭升降機上8/F就可以! 因為「大阪生活今昔館」的建築物同地下鐵站有通道相連，直接由B1F(地庫1樓)就可以乘升降機到8/F(今昔館)。抵達今昔館，先比入場費600 yen/位，和服體驗係另一個地方比錢。
(因為怕影到人地換衫，唔太禮貌，所以無影相，文字稍多)
由上層望落去就有條古裝街，中間最多人聚集果度，就係「和服體驗」，每人只係200 yen!!!! (限時30分鐘，包埋一對白襪比你方便穿木屣)
大家去到多人的果間「舖」，唔駛排隊住，排隊的人龍是準備更衣的。直接入去，會見到有部自動售票機，揀好你要體驗的人數就比錢，例如我地一家三口，先揀有3個人既公仔，代表三個人，之後入600 yen，一次過就有3張號碼票比你，旁邊就有工作人員即刻幫你登記(主要登記由邊個國家黎、3個人入面有幾多個大人細路咁....)，之後你好似飲茶拎位咁，睇電子牌顯示的號碼，入去準備換衫。換衫大家可以放心，因為佢唔駛你除衫，佢只係在你而家著既衣物上面再加上去，所以我提議大家為了唔好「露餡」，影相靚D，最好著圓領tee就會比較方便。
好啦，之後又有出人意表既事(旅行就是如此)，工作人員唔比瞳瞳「和服體驗」(晴天pig pig!!)，因為果度無佢咁細個小朋友size既衫，原來6歲以下、或者唔夠某個高度(其實我唔確實條線有幾高，總之瞳瞳唔夠高)，都唔可以參加，大鑊!!! 我買左票喎!!! 好彩，可以憑票在出口處搵服務台退票，拎番200 yen。不過瞳瞳無「和服體驗」又係好慘，我地兩公婆都無咩意思，於是我忽發奇想: 「一於出去買!!」 因為附近有商店街，應該會有的!! 結果我打算衝出去外邊買，點知係館內出口處售賣紀念品的地方，竟然有小童浴衣賣!!!! wow!!太好了!! 多多錢都殺，2500 yen，比錢啦~~~~~成家人一齊先好玩架嘛!! yeah!!
 |
| 古怪之瞳 |
呢度既埸景佈置得好精緻之外，仲有好多「道具」可以比你去拍照，而且瞳瞳爸爸覺得最絕既一樣野係: 呢個場景係會隨時間而把燈光調到黃昏、夜晚、放煙花的情景，真係好玩夾抵死到爆!!!
 |
| 神社 |
 |
| 連小狗都造得好細緻 |
 |
| 幫忙打掃街道先!! |
 |
| 雖然只係200 yen, 但都一絲不苛。 |
 |
| 好多埸景任你發揮! |
 |
| 日落黃昏時間到..... |
 |
| 夜晚啦, 後面天花正模擬放煙花 |
終於離開大阪生活今昔館，臨走前不妨再參觀大阪市的發展史同紀念品店。之後我地就去旁邊的天神橋筋行下同食午飯。天神橋筋商店街被稱為日本最長的商店街，由一丁目去到七丁目(意思係由第一段/街 去到第七段/街)，共橫跨三個地鐵站。由於我地下午要去奈良，只「係咁意」行一段，覺得呢邊比較地道同生活化，有食肆、100 yen店、傳統和服店等等，100 yen店瞳瞳媽媽都有收獲。
 |
| 天神橋筋六丁目 |
 |
| 傳統和服店 |
之後我地揀左一間好多當地人食既「天六食堂」，由於比較少遊客，所以今次無中文menu啦，不過好彩佢門口擺左好多公仔食物，於是我同店員行出店外手指指就點到食物了!!
 |
| 貼心的冰水啊!! |
 |
| 勁大勁厚的玉子 |
 |
| 瞳瞳媽媽點的，好好食既鐵板豬扒，墊底既生洋蔥同樣係亮點!! |
 |
| 我的天婦羅蝦定食也不錯!! 厚厚的玉子!! |
 |
| 最後追加鯖魚，肉身好厚，吉野家完全無得比。 |
飽頓一餐，再去奈良!!
有用資料:
1. 大阪生活今昔館逢星期二休息(但暑假照常開)，計劃行程前先參考網頁
2. 6歲以下小朋友及有高度限制，不能有「和服體驗」，小朋友爸媽可以自備一套浴衣去換影下相
3. 30分鐘和服體驗，雖然過時(over time)不會強行要你脫下，但還請大家自律。
4. 記得男男女女都要穿圓領tee比較方便，而且唔會「突個衣領出黎」
5. 程序 : 和服體驗 => 先入去有部自動售票機 => 揀好你要體驗的人數就比錢(200 yen 一位) => 有張有號碼的票比你 => 睇電子牌顯示的號碼，入去準備換衫
6. 大阪生活今昔館 地址 北區天神橋6-4-20
營業時間 10:00〜17:00（16:30停止入場）
營業時間 10:00〜17:00（16:30停止入場）
延伸閱讀：
[新手必看]Day1大阪奈良6日5夜親子之旅全攻略(4之1. 香港飛台北到大阪，相機失而復得，轉機其實好簡單!!)
[新手必看]Day1大阪奈良6日5夜親子之旅全攻略(4之2. 搭上外形極似鐵人28的南海電鐵Rapi:t直奔大阪市難波站)
[新手必看]Day1大阪奈良6日5夜親子之旅全攻略(4之3. 極盡地利、飽覽大阪市的swissotel NANKAI OSAKA 南海大阪瑞士酒店)
[新手必看]Day1大阪奈良6日5夜親子之旅全攻略(4之4. 日本第一餐:「燒肉力丸」放題)
[新手必看]Day2大阪奈良6日5夜親子之旅全攻略(2之1. 大阪環球影城:教你不用花一分錢買任何Express、不用園內撲入園劵，輕輕鬆鬆進入哈利波特的世界)
[新手必看]Day2大阪奈良6日5夜親子之旅全攻略(2之2. 大阪必到固力果招牌、網友激讚的平價抵食之選: 赤垣屋迴轉壽司)
[新手必看]Day3 大阪奈良6日5夜親子之旅全攻略(3之1. 嘆住冷氣和服體驗之大阪生活今昔館、日本最長商店街天神橋筋+天六食堂)
[新手必看]Day3 大阪奈良6日5夜親子之旅全攻略(3之2. 鹿的世界，瞳瞳爸爸講故事@東大寺 奈良公園+東大寺)
[新手必看]Day3 大阪奈良6日5夜親子之旅全攻略(3之3. 高島屋百貨簡介、晚餐: 難波地下街鰻魚飯、宵夜特集:燒賣、拉麵、章魚燒)
[新手必看]Day4 大阪奈良6日5夜親子之旅全攻略(2之1. DIY日清杯麵之旅、一風堂拉麵)
[新手必看]Day4 大阪奈良6日5夜親子之旅全攻略(2之2.梅田「大丸百貨TOMICA+SANRIO專門店」、觸得到的海洋世界「海遊館」、国産牛焼肉食べ放題)
[新手必看]Day5 大阪奈良6日5夜親子之旅全攻略(6/8 酒店＞漫遊道頓堀＞蟹道樂＞善導寺＞黑門市場＞日本藥品網頁介紹＞ 瞳瞳與屎屎人的趣事)
[新手必看]Day6 大阪奈良6日5夜親子之旅全攻略(7/8 中華航空大阪經台北返回香港+和颱風蘇迪羅鬥快+親子之旅小總結)
沒有留言:
張貼留言