瞳遊樂 (八十後香港家庭的親子旅遊blog): 【日本、大阪、奈良】[新手必看]第一次到日本,6日5夜大阪奈良親子遊全攻略(準備篇)

2015年8月9日星期日

【日本、大阪、奈良】[新手必看]第一次到日本,6日5夜大阪奈良親子遊全攻略(準備篇)

每年暑假，瞳瞳爸爸和瞳瞳媽媽都會準備一次外遊，陪女兒瞳瞳去玩，
其實之前的經驗，只限於台灣，一來女兒年紀比較細，怕水土不服，於是約一小時機程的台灣就變得剛剛好，而且台灣食物口味與香港相近，所以在食物上都盡可以配合。小試牛刀幾次去台灣之後，瞳瞳在搭飛機同旅途中都無咩大問題，於是個心雄左，睇下今年去台灣定日本了，不過就要平衡下邊先!

今次因原本打算也是去台灣(墾丁、高雄)，但發現原來墾丁房價在暑假期間

好貴，以墾丁悠活度假村為例，一晚房價要台幣8690 (約港幣$2172/晚)，瞳瞳爸爸既心情都汪阿姐一樣 - 「嚇死人咩個心離一離呀!!」。

唔坐直航，寧願轉機?

最近日元低迷，返工又沉悶，最好就係上去航空公司網站呀....酒店格價網站呀...搵下資料...咦! 發現中華航空做緊一個PROMOTION，台灣+日本的【一票雙城】優惠，而且自己計計下，瞳瞳一家今年去左兩次台灣，仲爭一次就可以得到「旅行台灣3送1」活動，細問之下，原來轉機都可以得到TPE<>HKG既登機證去做申請，咁都好，我地可以唔駛去多次台灣之餘，又可以參加到個免費送飛，咁我地一於決定有直航機都放棄，去大阪了。

行程安排有技巧!!!

第一步：「擬定行程」！瞳瞳4歲，年紀比較尷尬，正所謂「話大唔大、話細唔細」，但小朋友總唔可以要佢地趕行程，於是乎我地基本上都係hea玩，我地習慣會將一日計劃分為上午、下午及晚上3個section：

上午：小朋友起床+老婆幫佢梳洗扮靚+食早餐，各位爸爸千其唔好諗住晨咁早出發有行程，因為你會催趕老婆，老婆忙住搞小朋友，老婆心情唔靚，果日就提早玩完，可以唔駛出酒店門…..

中午：可以安排一至兩個行程，寧願深度遊，慢慢行慢慢睇，唔好貪心。

晚上：可以安排一個行程，其實晚上既行程，無咩特別的地方可以參觀，其實都係一家人聚下食餐好嘅，分享下今日去過的行程，然後就返酒店休息啦。

因為瞳瞳爸爸咁大個仔都未去過日本，所以就靠朋友幫手問資料、上網睇blog、睇旅遊書，於是就訂出以下行程

大阪奈良6日5夜親子之旅

2/8 香港出發＞台北轉機＞大阪關西機場＞南海RAPIT＞南海難波站àswissotel NANKAI OSAKA(南海大阪瑞士酒店)＞晚餐：燒肉力丸

3/8 酒店＞JR＞環球影城＞JR＞酒店＞晚餐：赤垣屋迴轉壽司

4/8酒店＞地下鐵＞大阪生活今昔館à＞天神橋筋商店街+天六食堂＞地下鐵+近鐵＞奈良東大寺+奈良公園＞近鐵＞晚餐：鰻魚飯

5/8 酒店＞地下鐵＞阪急＞池田インスタントラーメン発明記念館(日清即食麵紀念館)＞一風堂拉麵＞阪急＞梅田+SANRIO+TOMICA專門店＞地下鐵＞海遊館+天保山購物中心＞地下鐵＞晚餐：国産牛焼肉食べ放題

6/8 酒店＞蟹道樂＞驚安の殿堂/ 唐吉訶德＞黑門市場＞BIC CAMERA VS 藥妝＞晚餐：MC DONALD+宵夜蓬萊

7/8 酒店＞南海RAPIT＞大阪關西機場＞台北轉機＞香港

香港事前準備

整理好了，這就是我們行程，出發之前，幾樣野要在香港搞掂先:

1. 兌換日元：當日我地兌係6.3，可以在銀行、中環好出名既百X兌換，又或者去尖沙咀區一帶都可以，視乎你的習慣。日本可以用信用卡，如果係「銀聯」信用卡，仲唔收手續費添！不過要留意，原來又唔係每個地方都收「銀聯」，有時都係VISA或者MASTER，更有時仲會係CASH ONLY添!!!!

2. 去「縱橫遊」買大阪優惠三重賞(近鐵版)近鐵電車1 日票 + USJ 門券 + 哈利波特確定入場券 呢個套票真係好抵玩，去環球影城篇，瞳瞳爸爸會詳細解釋。

3. 去「EGL東瀛遊」買南海電鐵來回車票：2200 YEN，在分行直接買，不過要視乎分行當日有無車票買，同埋要CASH/EPS比錢，一去到大阪關西機場就可以直接去兌換車票，夠快唔駛排隊!!

4. WIFI電話卡 VS WIFI 蛋：瞳瞳爸爸覺得電話卡比較方便，因為可以同瞳瞳媽媽一人一張卡，方便失散搵到對方，WIFI電話卡只有上網功能，但可以透過Whatapp直撥或留下語音Message，同樣可以用另一種方式「傾電話」。至於WIFI 蛋，始終要兼顧多一樣物件，無謂多添煩惱。WIFI電話卡可以係深水埗鴨寮街買，我選的是富士卡，$110 七天無限上網，可以上Whatsapp同Facebook，收得唔錯呀!!最重要係，行程已經夠多嘢拎，唔好再拎多樣野啦，WIFI蛋唔見左仲要罰錢添！